岩岩過左既星期六, 我又同左我既私人model去影相啦, 好開心呀! 今次我地入左石澳, 去到既時候仲見到唔係咁好天, 仲有少少雨添, 初初都驚冇得影, 點知入到去見到一間間咁colourful既屋, 個天又開始冇咁陰, 咁我地就開始din左, 入面d屋真係好靚呀, 唔怪得咁多人黎影婚紗相啦. 呢2次出外影相, 都遇到d影婚紗相既couple, 果然係去左d影相勝地呀, 雖然眼見個個都拎大機影, 但我地d dc仔一d都唔弱, 不過如果有好d既陽光影出黎會仲好, 希望下次有機會再去過而係好好好好天啦~

影相真係好開心, 除左可以陶冶我既性情之外, 仲可以好relax咁訓響沙灘對住個海, 吹黎既海風真係好c服, 又可以比我發揮design既本能, 難得呢位model咁乖, 著晒我要佢著既衫, 頭都比我set埋, 叫佢點就點....咁乖既model去邊度搵?! 不過希望佢既影相技術都有進步, 雖然我鍾意幫人影, 但我都好想自己有d靚相架! 影相前籌備工作好開心, 影相過程好開心, 影完返黎睇見d相仍然好興奮, 再用photoshop整相框一樣咁開心, 成個過程好想再重覆一次.

呢個星期真係有d壓力, 人大左就會背負好多責任, 呢d責任係無形但沉重, 希望從照片中發洩出黎, 透過照片反映開心既一面, 從而將快樂延續.......

點解而家懶懶懶左咁多架? 係唔係已經唔想再update個blog啦? 好似係咁既.....不過有樣野好勤力架, 就係真係影左好多相, 係咁update個blog都只係想擺相落黎同大家分享. 不過又費時比人話我懶, 就講下我呢幾日做左d咩野啦, 首先尋日呢我又去左影相啦, 今次係去左中環區呀! 真係好勁, 由上環西港城開始一路行一路影---> 中環石板街/擺花街/名店街--->金鐘pp/廣告燈箱/天橋....足足影左6個鐘, 我地好似已經變左影相發燒友咁. 有冇咁鍾意影? 真係有呀, 越影越好玩添, 不過部相機開始有d問題, 我要快d拎去整先得, 唔係就有排都冇得玩. 呢期乜都壞, 電話又壞相機又壞, 個人都有d想壞......

玩左成日, 今日梗係要做下野啦, 做左好多家務之餘, 仲執左d相, 雖然我鍾意影相, 但人靠衣裝物靠包裝都係真既, 影相影得好當然重要啦, 但我呢d新手唔係真係影得好架嘛, 梗係要執一執啦, 但我執晚意思我係唔會做手腳既, 我只係加下框, 打下字咁jet, 再將佢upload上網, 大家睇落經過包裝既相都靚d丫, hee~ 係唔係好醒呢 (妖笑) 比d劣作大家睇下啦, 係呀, 係劣架, 佳作我收埋左呀, haha~

呢張唔係out focus呀, 係特登架~~

思考中....唔好嘈佢~

影得耐都要輕鬆下既~

幾識扮野, 肯響條街咁扮冇乜幾多個咋!(明明好多model都肯, 呆~)

影到攰死左啦~

又黎打blog啦, 呢個月真係好忙好忙, 因為好姊妹既大大大大大大project, 仲有每月一星(今個月做左兩星) 再加上自己岩岩轉工, 有好多開心事, 亦都有煩惱事, 所有都跟隨時間一一過去, 開心事令我永遠難忘, 呢世都會記住, 煩惱事? 沖走晒, 已經唔係好知為乜而煩惱lu. 呢個月既memories響好多照片度睇到出黎, 影左好多好多相, 多到我部電腦終於叫救命, 我要快d整返好個燒碟機先, 將所有相burn返晒出黎先, 免得到時死機咩野都冇晒, 我真係會喊架. 因為太多野, 亦都因為我太懶, 只好提供一d照片同大家分享, 唔講咁多啦~

勁呀~ 真係要誇讚一下, 呢餐中秋大餐, 大家估唔估到係邊個整架?
話你知, 呢餐飯全是肥仔既傑作, 我地一d都冇幫手, 海鮮餐係佢拿手好戲, 仲要係好好食添. 我最鍾意食佢既超辣東風鏍, 真係好正, 而家都仲好回味>< 多謝晒~

個地球儀真係好得, 我地整既公仔都好得, 希望我地可以快d好似d公仔咁環遊世界啦!
最慳皮既b cake你地見過未? 係由細食到大既孖寶蛋糕呀, 不過一d都唔求其架, 之前一晚我仲整緊架.

玩新郎玩得咁恐怖都係第一次見~~~

波鞋黨姊妹夠型~



此婚禮專用咪高峰~ (不得抄襲)

有冇響婚禮上見過咁型既相呀? 我地就覺得好好笑, 仲好鍾意添, 攝影師仲笑我地似響街市, 哈~哈~~

住左自己條村咁多年, 都係第一次響度影相, 原來最有味道同最有回憶既地方就在附近~

唔需要去數幾多支candle啦, 同個歲數無關架, 純粹為一個字 "靚"

因為b day主角鍾意ayu呀, 為左佢就買左ayu既相, 原來ayu真係幾靚架喎, 果晚唔係個個爭住同主角影相, 係爭住同ayu合照, hee~

連阿牛同唔放過ayu? (明明係我地迫佢, 呆)

潁b, 做乜拆媽咪d禮物呀?

睇返一連串屬於9月份既相, 真係想講"原來我地真係din+ed"但睇返既時候, 一幕幕開心既情景又再浮現啦~~~ 我地要繼續努力, 下次影多些, yeah^^

恭喜晒呀~~~ 祝你地幸福快樂, 白頭到老!

今日好勤力咁自己走左落街跑步, 因為轉左工之後d時間晏晒, 又冇做yoga, 但覺得自己個鼻好唔掂, 朝朝起身都好似透唔到氣咁唔係咁好, d人話跑步最好, 所以趁今日七點返到黎, 就即刻返屋企換衫, 用左5分鐘都冇既時間就衝落街. 聽住mp3黎跑, 隻腳就不受控咁, 越跑越快, 彈下彈下咁, 咁就彈左3個圈. 跑完之後個人出左成身汗, 我覺得好舒服呀....that's great~

近期冇咩野新手作呀, post返前一排整左既頸鍊出黎啦, 我都覺得佢好靚架, 期待緊帶佢出去影靚相.

終於完成左我2日1夜既all hands meeting, 開頭以為去開會都係開一日半日, 都會有d自由活動或者自己玩下, 點知真係開足2日, 第一日10點幾落船, 去到酒店, 連in都未check就要入大房開會, 簡直係一個馬拉松式既會, 一開開到7點幾, 眼訓多過乜, 我完全冇留心聽過, 因為佢係bilingual ---- 英語&國語, 悶到我死, d野又technical, 根本就冇心機聽, 不過夜晚就開心返, 因為有buffet食, 之後check in仲一人一間房, 本來就好驚既, 但一見到間房咁大就有d開心啦, hee~ 自己都忍唔住"嘩"左一聲, 間房真係超大, 仲大過我屋企. 冇錯~ 係大過我屋企, 我果間仲要係海景商業套房......夜晚既節目就係唱k, 打wii, 玩table tennis, 不過我樣樣都冇興趣, 我只係過左去另一個新同事既房一齊睇"家好月圓" 我地仲傾左好多野, 傾到12點幾先返房訓咋,(但走果時好驚囉, 因為要搭返lift落一層) 返到入房亂咁禁下電視, 發現左原來而家深宵時份係做緊"十月初五的月光", 咁我又睇埋先訓, 呆~ 仲夜過平時, 所以第二日我又勁冇精神去開會啦.

第二日個meeting就係group discussion, 我真係好好彩, 去左講mandarin果group, 因為有d group係要講english架.....真係嚇死, 如果真係去左果group, 我諗我唔使講野lu. 咁亦都好好彩既係, 我呢group d人幾active(明明全公司d人都好active, 都唔明d人好似好鍾意參與咁既) 我地既discussion就係要講下公司既優勢, 弱點呀, 危機呀, 機遇咁...... 深住~ 我對公司毫無認識, 個個都知我新黎既, 所以都冇特別問我. 但有一個環節我就超驚啦, 個trainer講明要最新既同事去present, 唉~ 咪係我囉, 有邊個夠我新丫, 返得果2日(但話時話, 全公司百幾人, 原來都有成5份1人係新人, 自我介紹時超多人咁) 首先就逐個人講一個point啦, 由於寫字果個人d字太潦啦, 好似寫書法咁, 有個人同佢講"第一個字我睇到係咩, 所以我估到第二個字, 但第三個字我已經睇唔到啦" 好好笑. 咁講完之後就要最新果個同事出去present啦, 不過佢地真係對我好好呀, group group人都係自己一個人出去present架, 就算係呢part新人present, 都係要自己行出去, 但佢地可能知我驚(hee~ 因為我成日都話好驚) 之後佢地就搵多個同事陪我出去講, 當係壯下膽咁, 我出到去時, 我係聽到自己把聲響度震架, 好樣衰, 咁當然震左幾隻字之後, 就冇事啦..... 我一路講, 一緊張停左扮鬼臉, 佢地就全場俾掌聲鼓勵我, 我一講唔到, 陪我出去果位同事就幫我講埋, 甚至乎我自己果group d人都嗌出黎幫我大聲講埋佢, 當然我都講左一d笑位引到全場都笑我啦. 不過估唔到之後跟住我出場既新同事話, 其實佢都好驚, 不過見我返左2日都出黎講得咁好, 佢就覺得自己都做左一個月啦, 冇理由咁都唔得架嘛, 所以佢既表現都好好呀我覺得.

經過呢2日之後, 感覺係同同事close左啦, 自己亦都諗通左d野, 所以個人就放鬆左d. 其實我知我自己個性格係比較固執, 可能真係金牛座, 死牛一面頸, 唔係好聽人講, 不過我亦都知道只有自己先至最清楚自己想要d咩野, 咩野係適合自己既, 唔係下下都要去到最後要試過先知, 我知點做架啦, 放心啦~

今日係返新工既大日子, 阿媽俾左封利是仔我, 不過依然不敵我黑仔既本色, 話說今日一開始就係錯既開始, 我搭村巴落早左一個站, 好彩仍然係灣仔, 但要自己行得遠住, 仲要返到公司, 仍然係未有人開門俾我, 明明果時都8:50am, 都要冇人.....市區d人咁鍾意遲到既?! 之後入到去, 佢地叫我坐一陣, 大約9:30左右, 有個hr既同事就叫我去meeting room, 同我講下我既contract, benefit咁, 之後再有個高級d既黎同我講公司既background, objective, goal...etc 超多野, 俾左本hand book我, 又俾一本公司既野我, 又俾叠野我, 全部加埋我要拎走既野都成吋厚, 佢仲要將本公司既資料書(明明平時呢d唔睇架嘛) 佢要成本同我上一次堂

呢d係叫做oriental training.....講到我打晒喊路, 我鄧個hr既人可憐, 每逢有新同事黎佢就要講一次, 我估佢一個月至少都要講一次, 唔怪得話呢度唔易抄人, 因為佢講得咁辛苦, 抄左就好晒啦.  講完晒再帶我兜公司一圈之餘, 仲要逐個介紹又扼手, 咁攪法已經到左11點, 間公司真係乜人都有, abc, 國語人, 外國人都大把, 不過我一個人都唔記得, 完全冇印象, 只係記得我dept果2個女仔, 其他乜都唔知, 跟住就有個welcome lunch同我食, 呆~ 真係好大對比, 尋日先食完farewell dinner, 明明依依不捨, 今日就要welcome....呆~

食左人地餐飯, 之後就梗係超多野做啦, 放響我table上要入既野有一隻手掌咁厚, 唉~~~~ 其實我覺得唔係full set果d壓力黎既, 不過係厚住多住野要趕deadline, 我係驚我入唔晒囉

又mth end. 最呆就係公司話下星期一二要全公司去南沙(大陸果邊)住2日1夜, 話係咩野all hands meeting喎, 全公司(包括海外)所有人都要出席, 仲要新人要介紹自己, 簡直就係攞我命. 明明都唔識人, 去黎做咩喎, 數下數下今個星期得返2日, 下星期又2日冇返, 我d野點趕得切mth end喎, 我真係好擔心囉, 唉~~~

今日都係6:15先走得, 我諗日日都要o下t架啦其實, 爭在幾多jet, 真係針冇2頭利係岩架.

今日都係阿head叫我走我先敢走咋.....不過頭先臨收工時, 唔記得抄低返晒d password,

攪到聽日又開唔到電腦, 要問返it人先得, 唔知佢地會唔會覺得我咁快有野唔記得呢.....呆~

８月１５日　　　　星期５　　　晴

呢幾日都係熱死, 不過仍然enjoy住響龍鼓灘既最後生活, 今日有個新人黎左, 開始handover d野俾佢, 由於佢都係熟手技工, 所以響handover方面都好easy~ 再加上我咁整齊, 佢都冇咩野好跟啦..... 放工之後同supplier johnny佢地去食farewell飯, 明明唔係好熟, 係都要食飯, 呆.....

８月１６日　　　　星期６　　　晴

今日又係熱死之日, 11點出去mk等阿pam收工, hee~ 因為今日係呢間公司既最後一個短週, 真係好, 臨尾都拎到個短週. 出去行左陣花園街, 好耐冇行過, 但係好熱. 之後約左表弟佢地去傾野, pam pan pen又再一次發揮佢傻人既本色, 令到我食餐飯都冇啖好食, 最好笑既係佢要嗌一杯熱既珍珠奶茶, 嗌完之後就問個waitress, "咁我可唔可以唔要珍珠呀?" 我同表弟即時反應謂"咁即係熱奶茶, 玩野" 想笑死人咩?! 食飽飽之後, 我就同阿pam展開我地今日既旅程, 首先去雅蘭拎野, 之後就去睇埋菇時(可惜菇時仍然係冇既) 跟住就搭巴士去我地想去左好耐既科學館啦, 好多人聽到我地要去呢度都覺得好好奇, um.....點講呢, 其實我地都係一個有文化既人黎架嘛, 好有氣質架~ 咁當然人地入去就係認識科學, 而我地就...............大家睇下以下圖片就知我地入去其實係做咩啦, 呆~

我冇將部相機打橫架, 呢個係側鏡, 影咩野都側晒架~

呢個就我拎黎拎去都影唔到樣既, 因為佢係背鏡

呢個叫"天生一對" 我地點影都係孖住, 真係煩, 阿pam痴住晒~ hee~

好恐怖呀>< 冇下半身既...

以下係玩頹廢look, 喂~~~ 再頹d得唔得呀你, 比d專業黎睇下好喎~

好cool呀pam pen pan~~~~ i like it~

今晚係預祝阿b既生日, 好開心呀, 每次同佢地一齊都係咁開心既, 點解呀???? 今次本日記同樽水用左我好多心機架(明明次次都係好多心機, 諗唔到邊次係冇心機) 不過好多謝你---主角有份參與買lace, 哈...哈...(參與左都唔知) 我想擺既相都俾人擺晒, 冇辦法啦, 照擺~~~ 由於有太多既吞吞吐吐, 所以我唔講咁多野啦, 睇相啦~

HAPI BIRTHDAY TO MY LOVE BBBBBBBBBBBBBBB

點解好似除左第一二日知道可以轉工係開心之外, 到而家都好似冇開心過咁既? 我冇懷疑過我既決定, 縱然而家同你地有幾咁唔捨得, 因為前途同埋我唔想再對住呢盤死數我都會走, 不過直至尋晚, 清晨5點見到阿爸好辛苦咁起左身, 猛話好辛苦想嘔, 但又嘔唔出, 個肚又脹又痛, 媽咪為佢行黎行去, 斟茶遞水, 摸背脊, 我就諗我究竟有冇揀錯? 如果將來我要隨時出黎睇佢, or有咩野事要睇佢, 請假係唔係會好麻煩呢?

可能心情問題, 今日揀d歌都係:
想你想得好孤寂
我是不是該安靜的走開
兩個人的幸運
對你太在乎......

好似全部歌名都好岩咁既.........不過最後我都揀左首好岩我而家聽既歌, 我會記住以下呢首歌既歌詞, 我會努力.

期待中我　煩悶枯橾 流浪街中的好一段日子
從未相信命運就是天意 只知道自我世界有苦惱

前面的世界誰人又知道 平坦的不一定是好
有些失意並未公報 想將我悶與痛快向你傾訴

聽說外面浮華如樂土 走出這世界會有千個夢兒
痛恨從前為何無從目睹 聽說這世界再次變得很美

忘記了今天失戀寄望在明天 心中更自傲　憑我的感覺找到
朋友都踏著命運腳步抗拒風雨 找到愛慕　在每一天我要不斷進步
你會某天叫好